30 വര്‍ഷത്തിന് ശേഷം റഹ്‌മാന്‍ സംഗീതം മലയാളത്തില; 'മലയന്‍കുഞ്ഞി'ലെ ആദ്യ ഗാനമെത്തി

ഫഹദ് ഫാസിലിനെ നായകനാക്കി സജിമോന്‍ പ്രഭാകര്‍ സംവിധാനം ചെയ്യുന്ന 'മലയന്‍കുഞ്ഞ്' എന്ന ചിത്രത്തിലെ ആദ്യ ഗാനമെത്തി. 'ചോലപ്പെണ്ണെ' എന്നു തുടങ്ങുന്ന പാട്ടിന് സംഗീതമൊരുക്കിയിരിക്കുന്നത് എ.ആര്‍ റഹ്‌മാനാണ്. 30 വര്‍ഷത്തിന് ശേഷം റഹ്‌മാന്‍ ഒരിക്കല്‍ കൂടി മലയാളത്തിന് വേണ്ടി പാട്ടൊരുക്കുന്നു എന്ന സവിശേഷതയും ഈ ചിത്രത്തിനുണ്ട്. 1992ല്‍ മോഹന്‍ലാല്‍ നായകനായ 'യോദ്ധ'യായിരുന്നു മലയാളത്തില്‍ റഹ്‌മാന്‍ സംഗീതം നല്‍കിയ ഏക ചിത്രം. പൃഥ്വിരാജിനെ നായകനാക്കി ബ്ലെസി സംവിധാനം ചെയ്യുന്ന 'ആടുജീവിതം' എന്ന ചിത്രത്തിന്റേയും സംഗീതം റഹ്‌മാനാണ്.

ഫഹദ് ഫാസിലും രജീഷ വിജയനും മുഖ്യവേഷത്തിലെത്തുന്ന ചിത്രത്തിലെ ആദ്യ ഗാനത്തിന്റെ ലിറിക്കല്‍ വീഡിയോയാണ് റിലീസ് ചെയ്തിരിക്കുന്നത്. വിനായക് ശശികുമാറാണ് വരികള്‍ എഴുതിയിരിക്കുന്നത്. പാട്ട് പാടിയത് വിജയ് യേശുദാസാണ്.

മഹേഷ് നാരായണന്‍ ആണ് ചിത്രത്തിന് തിരക്കഥയൊരുക്കുന്നത്. ചിത്രത്തിന്റെ എഡിറ്റിങ്ങും ഛായാഗ്രഹണവും മഹേഷ് നാരായണന്‍ തന്നെയാണ്. ജാതിരാഷ്ട്രീയമാണ് ചിത്രത്തിന്റെ പ്രമേയം എന്നാണ് വിവരം. എന്നാല്‍ ചിത്രത്തിന്റെ കഥയെ കുറിച്ചോ ഫഹദിന്റെ കഥാപാത്രത്തെ കുറിച്ചോ മറ്റ് അഭിനേതാക്കളെ കുറിച്ചോ ഇതുവരെ കൂടുതല്‍ വിവരങ്ങളൊന്നും പുറത്തുവന്നിട്ടില്ല.