ലൊക്കാനോയില്‍ നിന്നും ലണ്ടനിലേക്ക്; 'അറിയിപ്പ്' വീണ്ടും രാജ്യാന്തര തലത്തില്‍

ബ്രിട്ടീഷ് ഫിലിം ഇന്‍സ്റ്റിറ്റ്യൂട്ടിന്റെ ലണ്ടന്‍ ഫിലിം ഫെസ്റ്റിവലിലേക്ക് തിരഞ്ഞെടുക്കപ്പെട്ട് മഹേഷ് നാരായണന്റെ 'അറിയിപ്പ്'. കുഞ്ചാക്കോ ബോബന്‍, ദിവ്യപ്രഭ, അതുല്യ ആഷാഢം എന്നിവര്‍ പ്രധാന വേഷങ്ങളില്‍ എത്തുന്ന ചിത്രം നേരത്തേ സ്വിറ്റ്‌സര്‍ലാന്‍ഡിലെ 75ാമത് ലൊക്കോനോ ഫിലിം ഫെസ്റ്റിവലിലും പ്രദര്‍ശിപ്പിച്ചിരുന്നു.

ലൊക്കാനോ ചലച്ചിത്രമേളയുടെ അന്താരാഷ്ട്ര മത്സര വിഭാഗത്തില്‍ ഓപ്പണിങ് ചിത്രമായി പ്രദര്‍ശിപ്പിച്ച 'അറിയിപ്പി'ന് മികച്ച പ്രതികരണങ്ങളാണ് ലഭിച്ചത്. ലൊക്കാനോ ഫിലിം ഫെസ്റ്റിവലിന്റെ അന്താരാഷ്ട്ര മത്സര വിഭാഗത്തിലേക്ക് 17 വര്‍ഷത്തിന് ശേഷം തിരഞ്ഞെടുക്കപ്പെട്ട ചിത്രം കൂടിയാണ് 'അറിയിപ്പ്'.

കുഞ്ചാക്കോ ബോബന്‍ നായകനായെത്തുന്ന 'അറിയിപ്പ്' എന്ന ചിത്രത്തിന്റെ രചനയും സംവിധാനവും മഹേഷ് നാരായണന്‍ ആണ്. 'ടേക്ക് ഓഫ്', 'മാലിക്', 'സീ യു സൂണ്‍' സിനിമകള്‍ക്ക് ശേഷം മഹേഷ് ഒരുക്കിയ ചിത്രമാണിത്. ഉദയ പിക്‌ചേഴ്‌സിന്റെ 75-ാം വാര്‍ഷികത്തില്‍ നിര്‍മ്മിച്ചിരിക്കുന്ന ചിത്രം കൂടിയാണിത്.