പുതുവർഷത്തിൽ 'ബ്രോ ഡാഡി'. മോഹൻലാൽ - പൃഥ്വിരാജ് ചിത്രത്തിന്റെ ടീസർ റിലീസ് ചെയ്തു

ലൂസിഫറിന് ശേഷം മോഹൻലാലിനെ കേന്ദ്ര കഥാപാത്രമാക്കി പൃഥ്വിരാജ് സുകുമാരൻ സംവിധാനം ചെയ്യുന്ന 'ബ്രോ ഡാഡി'യുടെ ടീസർ യൂട്യൂബിൽ റിലീസ് ചെയ്തു. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിച്ച ചിത്രം ഡിസ്നി പ്ലസ് ഹോട്ട്സ്റ്റാറിലൂടെയാണ് റിലീസ് ചെയ്യുന്നത്.

ജോൺ കാറ്റാഡി എന്ന കഥാപാത്രമായി മോഹൻലാലും മകൻ ഈശോ ജോൺ കാറ്റാഡി ആയി പൃഥ്വിരാജും അഭിനയിക്കുന്ന ചിത്രത്തിൽ മീന, കല്യാണി പ്രിയദർശൻ, ലാലു അലക്സ്, ഉണ്ണി മുകുന്ദൻ, സൗബിൻ, കനിഹ, ജഗദീഷ്, മുരളി ഗോപി എന്നിവരുമുണ്ട്. ശ്രീജിത്ത് എൻ, ബിപിൻ മാളിയേക്കൽ എന്നിവർ ആണ് തിരക്കഥ എഴുതിയിരിക്കുന്നത്. അഭിനന്ദൻ രാമാനുജം ഛായാഗ്രഹണം നിർവ്വഹിച്ചിരിക്കുന്ന 'ബ്രോ ഡാഡി'ക്ക് ഈണമിട്ടിരിക്കുന്നത് ദീപക് ദേവാണ്.

നർമ്മത്തിന്റെ പശ്ചാത്തലത്തിൽ മോഹൻലാലും പൃഥ്വിരാജും അച്ഛനും മകനുമായി എത്തുന്ന ചിത്രം എന്ന നിലയിലും പൃഥ്വിരാജിന്റെ രണ്ടാമത്തെ സംവിധാന സംരംഭം എന്ന രീതിയിലുമാണ് 'ബ്രോ ഡാഡി'ക്കുള്ള പ്രേക്ഷക പ്രതീക്ഷ.