ഹൃദയം തൊട്ട് ഇന്ദ്രൻസിന്റെ 'ഹോം' ട്രൈലർ!

ഇന്ദ്രൻസ്, ശ്രീനാഥ് ഭാസി എന്നിവർ പ്രധാന വേഷത്തിലെത്തുന്ന 'ഹോം' സിനിമയുടെ ആവേശകരമായ ട്രൈലർ ആമസോൺ പ്രൈം റിലീസ് ചെയ്തു. ഓഗസ്റ്റ് 19 ന് ആമസോൺ പ്രൈം വീഡിയോയിലൂടെ ചിത്രം റിലീസ് ചെയ്യും.

കുടുംബത്തില്‍ നിന്ന് വിട്ട് പോകാനും സോഷ്യല്‍ മീഡിയയിൽ മുഴുകാനും വെമ്പുന്ന മക്കളെ ചേര്‍ത്തു നിര്‍ത്താ൯ ശ്രമിക്കുന്ന ഒലിവറിന്റെ കഥയാണ് 'ഹോം' എന്ന കുടുംബ ചിത്രം .

പ്രായപൂർത്തിയായ ആൺമക്കളുമായി ബന്ധം സ്ഥാപിക്കാൻ ഇന്ദ്രൻസ് അവതരിപ്പിക്കുന്ന ഒലിവർ എന്ന കഥാപാത്രം പാടുപെടുന്നതും താമസിയാതെ അദ്ദേഹം സോഷ്യൽ മീഡിയ ലോകത്ത് മുഴുകുന്നതുമാണ് ഏകദേശം 3 മിനിറ്റ് ദൈർഘ്യമുള്ള ട്രൈയിലർ വീഡിയോ കാണിച്ചു തരുന്നത്.

റോജിന്‍ തോമസ് രചനയും സംവിധാനവും നിര്‍വഹിച്ചിരിക്കുന്ന ചിത്രം നിര്‍മ്മിച്ചിരിക്കുന്നത് ഫ്രൈഡേ ഫിലിംസിന്റെ ബാനറിൽ വിജയ് ബാബുവാണ്. വിജയ് ബാബു, മഞ്ജു പിള്ള, കൈനകരി തങ്കരാജ്, കെപിഎസി ലളിത, ശ്രീകാന്ത് മുരളി, ജോണി ആന്റണി, പോളി വില്‍സണ്‍, മണിയന്‍ പിള്ള രാജു, അനൂപ് മേനോന്‍, അജു വര്‍ഗീസ്, കിരണ്‍ അരവിന്ദാക്ഷന്‍, ചിത്ര, പ്രിയങ്ക നായര്‍ എന്നിവരും ചിത്രത്തിലുണ്ട്.