പ്രതിസന്ധികൾക്കൊടുവിൽ 'കുറുപ്പ്' തിയേറ്ററിലേക്ക്. റിലീസ് തീയതി പ്രഖ്യാപിച്ച് ദുൽഖർ സൽമാൻ.

കൂട്ടിലടക്കപെട്ട 'കുറുപ്പ്' ലോകമെമ്പാടുമുള്ള തിയേറ്ററുകളിൽ റിലീസ് ചെയ്യാൻ ഒരുങ്ങുകയാണ് എന്നറിയിച്ച് ദുൽഖർ സൽമാൻ. ദുൽഖറിന്റെ കരിയറിലെ തന്നെ ഏറ്റവും വലിയ ബഡ്ജറ്റിൽ ഒരുങ്ങുന്ന ചിത്രം നവംബർ 12 ന് തിയേറ്ററുകളിൽ പ്രദർശനത്തിനെത്തും. മലയാളം, തമിഴ്, തെലുങ്ക്, ഹിന്ദി, കന്നഡ ഭാഷകളിലാണ് റിലീസ്. OTT പ്ലാറ്റ്ഫോമിൽ റിലീസ് ചെയ്യാൻ വലിയ ഓഫറുകൾ ലഭിച്ചിരുന്നു എങ്കിലും തിയേറ്റർ റിലീസിനായി ശ്രമിക്കുകയായിരുന്നു അണിയറ പ്രവർത്തകർ.

കേരളത്തിലെ കുപ്രസിദ്ധ പിടികിട്ടാപ്പുള്ളി സുകുമാര കുറുപ്പിന്റെ ജീവിതത്തെ ആസ്പദമാക്കിയാണ് ചിത്രം ഒരുക്കിയിരിക്കുന്നത്. ദുൽഖർ സൽമാന്റെ ആദ്യ ചിത്രം 'സെക്കൻഡ് ഷോ' ഒരുക്കിയ ശ്രീനാഥ് രാജേന്ദ്രനാണ് സംവിധാനം. ജിതിൻ കെ ജോസിന്റെ കഥക്ക് തിരക്കഥയും സംഭാഷണവും ഒരുക്കിയിരിക്കുന്നത് ഡാനിയേൽ സായൂജ് നായരും കെ എസ് അരവിന്ദും ചേർന്നാണ്. ഛായാഗ്രഹണം നിമിഷ് രവി. സുഷിൻ ശ്യാം സംഗീത സംവിധാനവും നിർവഹിക്കുന്നു. 35 കോടി മുതൽമുടക്കിൽ ഒരുങ്ങുന്ന ചിത്രം നിർമിക്കുന്നത് ദുൽഖർ സൽമാന്റെ വേഫറെർ ഫിലിംസും എം സ്റ്റാർ എന്റർടൈൻമെന്റ്സും ചേർന്നാണ്. കേരളത്തിലും അഹമ്മദാബാദ്, ബോംബെ, ദുബായ്, മാംഗ്ലൂർ, മൈസൂർ എന്നിവിടങ്ങളിലുമായിരുന്നു ചിത്രീകരണം.

മൂത്തോൻ എന്ന ചിത്രത്തിലൂടെ മലയാള സിനിമയിലേക് വന്ന ശോഭിത ധുലിപാലയാണ് ചിത്രത്തിൽ ദുൽഖറിന്റെ നായികയായി എത്തുന്നത്. ഇന്ദ്രജിത് സുകുമാരൻ, സണ്ണി വെയ്ൻ, ഷൈൻ ടോം ചാക്കോ, വിജയരാഘവൻ, പി ബാലചന്ദ്രൻ, സുരഭി ലക്ഷ്മി, ശിവജിത് പദ്മനാഭൻ തുടങ്ങിയവരും ചിത്രത്തിൽ അഭിനയിക്കുന്നുണ്ട്.