തെലുങ്കിലും മാസ്സ് ആയി മമ്മൂട്ടി; 'ഏജന്റ്' ടീസര്‍ പുറത്തുവിട്ടു

മമ്മൂട്ടിയും അഖില്‍ അക്കിനേനിയും കേന്ദ്രകഥാപാത്രങ്ങളായി എത്തുന്ന തെലുങ്ക് ചിത്രം 'ഏജന്റി'ന്റെ ടീസര്‍ പുറത്തുവിട്ടു. അഞ്ച് ഭാഷകളിലായി പാന്‍ ഇന്ത്യ റിലീസായി ആണ് ചിത്രം എത്തുന്നത്. ചിത്രത്തില്‍ മമ്മൂട്ടിയുടെ കഥാപാത്രത്തിനും തുല്യ പ്രാധാന്യം ഉണ്ടെന്നാണ് ടീസറില്‍ നിന്ന് മനസിലാകുന്നത്. ചിത്രം സംവിധാനം ചെയ്യുന്നത് സുരേന്ദര്‍ റെഡ്ഡിയാണ്. നാഗാര്‍ജുനയുടെ മകന്‍ അഖില്‍ അക്കിനേനിയാണ് ചിത്രത്തിലെ കേന്ദ്ര കഥാപാത്രം.

മഹാദേവ് എന്ന കഥാപാത്രമായാണ് 'ഏജന്റി'ല്‍ മമ്മൂട്ടി എത്തുന്നത്. കുപ്രസിദ്ധന്‍, ഏറ്റവും ക്രൂരനായ രാജ്യസ്‌നേഹി എന്നെല്ലാമാണ് കഥാപാത്രത്തെ കുറിച്ച് ടീസറില്‍ പറയുന്നത്. മമ്മൂട്ടി ചിത്രത്തില്‍ വില്ലനാണെന്നും നേരത്തേ റിപ്പോര്‍ട്ടുകള്‍ പുറത്തുവന്നിരുന്നു.

'യാത്ര' എന്ന ചിത്രത്തിന് ശേഷം മമ്മൂട്ടി അഭിനയിക്കുന്ന തെലുങ്ക് ചിത്രമാണ് 'ഏജന്റ്'. ആന്ധ്ര പ്രദേശ് മുന്‍ മുഖ്യമന്ത്രിയായിരുന്ന വൈ എസ് രാജശേഖര റെഡ്ഡിയുടെ കഥപറഞ്ഞ ചിത്രമായിരുന്നു 'യാത്ര'