'മിന്നൽ മുരളി' എത്തുന്നു; സെപ്റ്റംബറിൽ നെറ്റ്ഫ്ലിക്സിൽ.

ടൊവിനോ തോമസ് നായകനായ മിന്നൽ മുരളി ഈ വർഷം സെപ്റ്റംബറിൽ നെറ്റ്ഫ്ലിക്സിൽ റിലീസ്‌ ചെയ്യാനൊരുങ്ങുന്നു. ഒരു സൂപ്പർഹീറോയുടെ വേഷത്തിലാണ് ചിത്രത്തിൽ ടോവിനോ എത്തുന്നത്. സൂപ്പർഹീറോ സിനിമകളിലേക്കുള്ള മലയാള സിനിമയുടെ പ്രവേശനത്തെ അടയാളപ്പെടുത്തുന്ന ചിത്രമായിരിക്കും മിന്നൽ മുരളി. വീക്കെൻഡ് ബ്ലോക്ക്ബസ്റ്റേഴ്സിന്റെ ബാനറിൽ സോഫിയ പോൾ നിർമ്മിക്കുന്ന മിന്നൽ മുരളി ബേസിൽ ജോസഫ് ആണ് സംവിധാനം ചെയ്തിരിക്കുന്നത്.

മിന്നൽ മുരളിയുടെ ഒരു പുതിയ പോസ്റ്റർ സോഷ്യൽ മീഡിയയിൽ റിലീസ് ചെയ്തുകൊണ്ടാണ് ചിത്രം നെറ്റ്‌ഫ്ലിക്സിൽ സെപ്റ്റംബറിൽ റിലീസ് ചെയ്യുന്ന വിവരം നിർമാതാക്കൾ അറിയിച്ചത്. ചിത്രത്തിന്റെ അവകാശം നെറ്റ്ഫ്ലിക്സ് വൻ വിലയ്ക്കാണ് സ്വന്തമാക്കിയിരിക്കുന്നത്.

വ്യത്യസ്ത പേരുകളിൽ വിവിധ പ്രാദേശിക ഭാഷകളിലും ചിത്രം റിലീസ് ചെയ്യാനൊരുങ്ങുന്നുണ്ട്. ഹിന്ദിയിൽ മിസ്റ്റർ മുരളി എന്നും തെലുങ്കിൽ മെരുപ്പ് മുരളി എന്നും ചിത്രത്തിന് പേരിട്ടു. കന്നഡയിൽ മിഞ്ചു മുരളി എന്നു പേരിട്ടിട്ടുള്ള ചിത്രം തമിഴിലും മിന്നൽ മുരളി എന്ന പേരിലായിരിക്കും റിലീസ് ചെയ്യുന്നത്. ടൊവിനോ തോമസിനെ കൂടാതെ ഹരിശ്രീ അശോകൻ, അജു വർഗീസ് എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നുണ്ട്. ബേസിൽ ജോസഫിന് ഒപ്പമുള്ള ടോവിനോയുടെ രണ്ടാമത്തെ ചിത്രമാണ് ഇത്.