എം പദ്മകുമാറിന്റെ 'പത്താം വളവ്': സുരാജും ഇന്ദ്രജിത്തും പ്രധാന വേഷത്തിൽ

എം പദ്മകുമാർ സംവിധാനം ചെയ്യുന്ന പത്താം വളവിന്റെ മോഷൻ പോസ്റ്റർ റിലീസ് ചെയ്തു. മമ്മൂട്ടി, വിജയ് സേതുപതി, പൃഥ്വിരാജ് തുടങ്ങിയവരുടെ സോഷ്യൽ മീഡിയ പേജുകളിലൂടെയാണ് സിനിമ പ്രഖ്യാപിച്ചത്. സുരാജ് വെഞ്ഞാറമൂടും ഇന്ദ്രജിത്തും പ്രധാന കഥാപാത്രങ്ങളെ അവതരിപ്പിക്കുന്ന ചിത്രത്തിൽ, അദിതി രവി, സാസ്വിക എന്നിവരും അഭിനയിക്കുന്നു.

അഭിലാഷ് പിള്ളയാണ് തിരക്കഥ ഒരുക്കിയിരിക്കുന്നത്. ഒരു ഫാമിലി സസ്പെൻസ് ത്രില്ലർ ഗണത്തിൽപ്പെടുന്ന ചിത്രമായിരിക്കുമിത് എന്നാണ് സൂചനകൾ. എം പദ്മകുമാറിന്റെ 'ജോസഫി' ലെ 'പൂമുത്തോളെ' എന്ന ഹിറ്റ്‌ ഗാനം ഒരുക്കിയ രഞ്ജിൻ രാജാണ് സംഗീത സംവിധാനം നിർവ്വഹിക്കുന്നത്.

"ഒരുപാട് സെറ്റ് വർക്ക് ഉള്ള സിനിമയാണിത്. വലിയ ബഡ്ജറ്റിൽ ഒരുക്കിയ ഒരു സെറ്റ് കോവിഡ് ലോക്ക്ഡൗണും തുടർന്ന് ഉണ്ടായ പ്രതികൂല കാലാവസ്ഥയും കാരണം നശിക്കുകയും രണ്ടാമത് ചെയ്യേണ്ടതായി വരികയും ചെയ്തു. ഈ സിനിമ അതിന്റെ പൂർണതയിൽ ആസ്വദിക്കണമെങ്കിൽ ബിഗ് സ്‌ക്രീനിൽ തന്നെ കാണണം. അതുകൊണ്ട് തന്നെ ഒരു തീയേറ്റർ റിലീസ് ആയാണ് സിനിമ പ്ലാൻ ചെയ്യുന്നത്".നിർമാതാക്കളിൽ ഒരാളായ ജിജോ കാവനാൽ പറഞ്ഞു.

UGM ന്റെ ബാനറിൽ സക്കറിയ തോമസ്, ജിജോ കാവനാൽ, ശ്രീജിത്ത്‌ രാമചന്ദ്രൻ, പ്രിൻസ് പോൾ എന്നിവർ ചേർന്നാണ് ചിത്രം നിർമ്മിക്കുന്നത്.