പ്രണയത്തോടെ നിമിഷയും റോഷനും; 'എന്തര് കണ്ണെടേയ്' പാട്ട് ട്രെൻഡിങ്
- POPADOM
- Aug 9, 2022
- 1 min read
ബിജു മേനോനെ നായകനാക്കി നവാഗതനായ ശ്രീജിത്ത് എന്‍ സംവിധാനം ചെയ്യുന്ന 'ഒരു തെക്കന്‍ തല്ല് കേസ്' എന്ന ചിത്രത്തിലെ 'എന്തര് പാട്ട്' പുറത്തിറങ്ങി. എണ്‍പതുകളിലെ നാടന്‍ പശ്ചാത്തലത്തില്‍ ചിത്രീകരിച്ചിരിക്കുന്ന പാട്ടിന് സംഗീതം നിര്‍വഹിച്ചിരിക്കുന്നത് ജസ്റ്റിന്‍ വര്‍ഗ്ഗീസ് ആണ്. ഹിംന ഹിലാരിയും ജസ്റ്റിന്‍ വര്‍ഗ്ഗീസും ചേര്‍ന്ന് ആലപിച്ച ഈ ഗാനത്തിന്റെ വരികള്‍ അന്‍വര്‍ അലിയുടേതാണ്. റോഷന്‍ മാത്യുവും നിമിഷ സജയനുമാണ് ഗാനത്തില്‍ പ്രത്യക്ഷപ്പെടുന്നത്.
തെക്കന്‍ കേരളത്തിലെ ഒരു തീരദേശഗ്രാമത്തില്‍ എണ്‍പതുകളില്‍ നടക്കുന്ന സംഭവവികാസങ്ങളെ അടിസ്ഥാനമാക്കിയാണ് ഈ ചിത്രം അണിയിച്ചൊരുക്കിയിരിക്കുന്നത്. 'ബ്രോ ഡാഡി'യുടെ രചയിതാക്കളില്‍ ഒരാള്‍ കൂടിയാണ് ചിത്രത്തിന്റെ സംവിധായകന്‍ ശ്രീജിത്ത് എന്‍.
പ്രശസ്ത എഴുത്തുകാരന്‍ ജി. ആര്‍. ഇന്ദുഗോപന്‍ എഴുതിയ 'അമ്മിണിപ്പിള്ള വെട്ട് കേസ്' എന്ന ജനപ്രിയ നോവലിനെ ആസ്പദമാക്കിയാണ് ചിത്രം ഒരുക്കിയിരിക്കുന്നത്. ഓണം റിലീസായിട്ടാണ് ചിത്രം തിയേറ്ററുകളില്‍ എത്തുന്നത്. E4 എന്റര്‍ടെയ്ന്‍മെന്റിന്റെയും ന്യൂ സൂര്യ ഫിലിംസിന്റെയും ബാനറില്‍ മുകേഷ്. ആര്‍. മെഹ്ത്ത, സി. വി. സാരഥി, സുനിൽ എ. കെ. എന്നിവര്‍ ചേര്‍ന്നാണ് ചിത്രം നിര്‍മിച്ചിരിക്കുന്നത്.
Comments