വെള്ളിത്തിര ഇളക്കിമറിക്കാന്‍ കമലും ഫഹദും വിജയ് സേതുപതിയും; വിക്രം ഫസ്റ്റ്‌ലുക്ക് പോസ്റ്റര്‍

കമല്‍ഹാസന്‍ മുഖ്യവേഷത്തിലെത്തുന്ന ലോകേഷ് കനകരാജ് ചിത്രം വിക്രത്തിന്റെ ഫസ്റ്റ്‌ലുക്ക് എത്തി. കമല്‍ഹാസനൊപ്പം വിജയ് സേതുപതിയും ഫഹദ് ഫാസിലും പോസ്റ്ററിലുണ്ട്. കമലിന്റെ ഇരുന്നൂറ്റി മുപ്പത്തിരണ്ടാമത്തെ ചിത്രമെന്ന പ്രത്യേകതയുമായി എത്തുന്ന വിക്രം നിര്‍മിക്കുന്നത് അദ്ദേഹത്തിന്റെ നിര്‍മ്മാണ കമ്പനിയായ രാജ്കമല്‍ ഫിലിംസ് തന്നെയാണ്. കമല്‍ഹാസനും ഫഹദ് ഫാസിലിനും വിജയ് സേതുപതിക്കുമൊപ്പം നരെയ്‌നും ചിത്രത്തില്‍ ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. ഗ്യാങ്സ്റ്റര്‍ സിനിമയാകും വിക്രം.

കൈതി, മാസ്റ്റര്‍ എന്നീ സൂപ്പര്‍ഹിറ്റ് ചിത്രങ്ങളിലൂടെ ശ്രദ്ധേയനാണ് സംവിധായകനാണ് ലോകേഷ് കനകരാജ്. ചിത്രത്തില്‍ ഫഹദിന്റേത് വില്ലന്‍ കഥാപാത്രമാണോ എന്ന ചോദ്യവും ഉയര്‍ന്നിട്ടുണ്ട്. അനിരുദ്ധാണ് ചിത്രത്തിന്റെ സംഗീത സംവിധാനം.

വിജയ് നായകനായ 'മാസ്റ്ററി'നു ശേഷം ലോകേഷ് കനകരാജ് സംവിധാനം ചെയ്യുന്ന ചിത്രമാണിത്. കമല്‍ഹാസന്റെ കഴിഞ്ഞ പിറന്നാള്‍ ദിനത്തിലായിരുന്നു ചിത്രത്തിന്റെ ടൈറ്റില്‍ പ്രഖ്യാപനം. ഗിരീഷ് ഗംഗാധരനാണ് ഛായാഗ്രാഹകന്‍. ലോകേഷ് ചിത്രങ്ങളായ കൈതിയുടെയും മാസ്റ്ററിന്റെയും ഛായാഗ്രാഹകനായ സത്യന്‍ സൂര്യനെയാണ് വിക്രത്തിലും ആദ്യം നിശ്ചയിച്ചിരുന്നതെങ്കിലും അദ്ദേഹത്തിന് മറ്റു പ്രോജക്റ്റുകളുടെ തിരക്കുകള്‍ വന്നതിനാല്‍ പിന്മാറുകയായിരുന്നു.

ചെന്നൈയില്‍ വൈകാതെ ചിത്രീകരണം ആരംഭിക്കും. 2022ല്‍ തിയറ്ററുകളിലെത്തിക്കാനാണ് പദ്ധതി.